काठमाडौं,
मंसिर ७-प्रमुख प्रतिपक्षी दल नेपाली काङग्रेस केन्द्रीय कार्यसमितिको बैठक आज बस्दै छ । बैठकमा पाटि भित्रको आन्तरिक विवाद र समसामयिक राजनीतिक परिस्थितिका बारेमा बैठकमा छलफल हुनेछ । केन्द्रीय कार्यालय सानेपामा बस्ने बैठकमा दलहरुसंग भएको पछिल्लो सहमतिका साथै संविधान निर्माण, शान्ति प्रक्रियाका विषयमा पनि छलफल हुने बुझिएको छ ।यसैबीच काग्रेस वरिष्ठ नेता शेरबहादुर देउवा पक्षले आजको केन्द्रीय समितिको बैठक बहिष्कार गर्ने बताएको छ ।
भ्रातृ सङ्गठनहरूलाई पार्टी सभापतिले विना कारण विघटन गरेका कारण आपत्ति जनाउँदै आएको देउबा पक्षले हिजो सभापतिलाई भेटी आन्तरिक विवाद मिलाएर मात्रै केन्द्रीय समितिको बैठक बोलाउन आग्रह गरेको थियो । सभापति कोईरालाले भने सहमतिबाट नै विवाद मिलाईने भन्दै बैठकमा सहभागी हुन देउवा पक्षका केन्द्रीय सदस्यहरूलाई आग्रह गर्नुभएको थियो । यता देउवा पक्षले केन्द्रीय समितिको बैठक स्थगित गर्न आग्रह गरेको छ । देउवा पक्षीय नेताहरुको देउवा निवास बुढानिलकण्ठमा भएको भेलाले बैठक स्थगितको आग्रह गरेको हो । पार्टी भित्रको आन्तरिक विवाद कायम रहेको अवस्थामा बैठकको औचित्य नरहेको भन्दै देउवा पक्षले बैठक स्थगित गर्न र स्थगित नगरिए बहिष्कार गर्ने निर्णय गरेको छ ।
