तनहुँ, २४ कार्तिक
मर्मत कार्यका लागि पृथ्वीराजमार्गको मुग्लिन पुल फेरी तीन दिन बन्द हुने भएको छ । दिनभर पुलमा सवारी चल्ने हुँदा काम गर्न नसकिने भएकोले राती ९ बजे देखि बिहान ९ बजेसम्म यातायात बन्द गरी पुल मर्मत गर्न लागिएको हो ।
पुल मर्मतका लागि कात्तिक २४ गते बिहीबार देखि कात्तिक २६ गते शनिवारसम्म पुलमा यातायात बन्द गर्न लागिएको इलाका प्रहरी कार्यालय आँबुखैरेनीका प्रहरी निरीक्षक विरेन्द्र थापाले बताए ।यस अगाडि भदौ महिनामा समेत जीर्ण भएको मुग्लिङ पुलको मर्मत कार्य गरिएको थियो । त्यस क्रममा पुलको काठको डेक निकाली स्टील राख्ने खिया लागेका नल बल्ट फेर्ने स्टील पेन्ट गर्ने लगायत कार्य सम्पन्न भएको थियो ।
२०२८ सालमा निर्मित यो पुल पृथ्वी राजमार्गको सबैभन्दा पुरानो पुल मानिन्छ । उक्त पुल भएर तनहूँ लगायत कास्की गोरखा लमजुङ पर्वत स्याङजा बागलुङ लगायतका जिल्लाका यात्रुहरु आवातजावात गर्ने गर्दछन् ।
