काठमान्डौ
माघ ४ गते ।
भारत भ्रमणमा रहेका नेपालका उपप्रधान एवम गृहमन्त्री विजयकुमार गच्छदारले भारतीय प्रधानमन्त्री डा मनमोहन सिह नेपाल भ्रमणमा आउन ईच्छुक रहेको जानकारी दिनुभएको छ । भारत भ्रमणको क्रममा आज प्रधानमन्त्री सिहसँग झण्डै ४५ मिनेट भेटवार्ता गरेका गच्छदारले आफूसँगको भेटमा सिहले म छिट्टो नेपाल भ्रमणमा आउन ईच्छुक छु, उपयूक्त समय मिलाउनुपर्छ, भनेर भनेको सञ्चारकर्मीलाई जानकारी गराउनुभयो । भेटमा भारतीय प्रधानमन्त्री सिहले नेपालमा जारी शान्ति प्रक्रिया अवरुद्ध हुनुको कारण, पुर्नबर्गिकरणपछि काम हुन नसकेको, संविधान निर्माणमा देखिएको विवाद र दलहरुवीच पछिल्लो समयमा देखिएको असहमतिको अवस्थाको विषयमा गंभिर चासो प्रकट गर्नुभएको थियो । त्यसैगरी नेपालमा तोकिएकै समयमा शान्ति प्रक्रिया पुरा भएर लोकतान्त्रिक संविधान जारी हुनु पर्ने पक्षमा भारत रहेको भन्दै प्रधानमन्त्री सिहले शान्ति, संविधान र आर्थिक प्रगतिको लागी भारत जस्तो सुकै सहयोग गर्न तयार रहेको आश्वासन दिनुभएको थियो ।
