काठमान्डौ पुस २६ गते ।
एकीकृत नेकपा माओवादीका सचिव सीपी गजुरेलले नेपाली काङ्ग्रेस र नेकपा एमालेले भने जस्तो संविधान कुनै पनि हालतमा बन्न नदिने ठोकुवा गर्नुभएको छ । रिपोर्टर्स क्लब आज गरेको साक्षात्कारमा सचिव गजुरेलले पार्टीले उठाएको संविधानको अन्तर्वस्तुलाई पार्टीले कुनै पनि हालतमा नछाड्ने स्पष्ट पार्दै भोलि बस्ने पार्टीको केन्द्रीय समितिको बैठकमा लिखित प्रस्ताव नै प्रस्तुत हुने जानकारी पनि दिनुभयो ।गजुरेलले क्रान्तिकारी भूमिसुधार लागू गरेर बढी भएको जग्गा भूमिहीन र सुकुम्बासीलाई वितरण गर्ने, आत्मनिर्णयको अधिकारसहितको सङ्घीयता, मजदुर र किसानलाई सबैभन्दा बढी अधिकार दिने, राष्ट्रपति कार्यकारी हुने शासन ब्यवस्था र निर्वाचन प्रणालीका विषयमा भोलिको केन्द्रीय समितिको बैठकले स्पष्ट पार्ने पनि बताउनुभयो । काङ्ग्रेस र एमालेका कारण शान्ति प्रक्रिया र संविधान निर्माण कार्य जोखिममा परेको आरोप लगाउँदै संसदीय व्यवस्था कुनै पनि हालतमा नमान्ने गजुरेलको भनाइ छ ।
उहाँले काङग्रेस र एमालेलगायतका दलहरूले आफूहरुको विरुद्ध मोर्चाबन्दी गरेकाले जनसंविधान र जनताको सङ्घीय गणतन्त्र स्थापनका लागि पार्टी एकताभएको बताउनुभयो ।
