काठमाडौं माघ ३ गते।
व्यवसायी अपहरणको आरोपमा पक्राउ परेका सभासद् श्यामसुन्दर गुप्तालाई अनुसन्धानका लागि ४ दिन थुनामा राख्न जिल्ला अदालत काठमाडौंले आदेश दिएको छ । न्यायाधीश भोजराज शर्माको एकल ईजलाशले गुप्तालाई ४ दिन पुर्पक्षका लागि थुनामा राखि अनुसन्धान अघि बढाउन आदेश दिएको हो । व्यवसायी पवन संघाइको अपहरणका मुख्य योजनाकारको अभियोगमा गुप्तालाई महाशाखाको टोलीले हिजो भैरहवाबाट पक्राउ गरेको थियो । गएराति राजधानी ल्याइएका सभाषद् गुप्ताको योजनामा व्यवसायी संघाइको अपहरण भएको प्रहरीको दावी छ ।यसैबिच, म्याद थपका लागि अदालतमा उपस्थित भएका गुप्ताले आफूमाथि लागेको अभियोग अस्विकार गर्दै मधेसी मोर्चा र एकीकृत माओवादीले आफूलाई फसाउन खोजेको आरोप लगाउनुभयो । विशेष गरी मोर्चाले आफ्नो लामो राजनीतिक जीवन समाप्त पार्ने षड्यन्त्र गरेको र माओवादीले समेत मोर्चालाई सहयोग गरेको उहाँको भनाई छ ।
