जाजरकोट, १४ चैत । एसएलसी परीक्षामा चिट खोसेको भन्दै जाजरकोटको एक गाउँमा प्रमुख जिल्ला अधिकारीको टोलीले बासै नपाएको थाहा भएको छ। अनिवार्य गाणित विषयको परीक्षाको दिन परीक्षा कडा गरेको भन्दै खगेनकोटको दल्लीमा प्रजिअको टोलीलाई साँझमा स्थानीय एक शिक्षकले घरमा बास बस्न नदिएको बताइएको छ।
त्रिभुवन उच्च मावि दल्ली परीक्षा केन्द्रमा परीक्षा अनुगमनका लागि गएका प्रमुख जिल्ला अधिकारी गोविन्दप्रसाद रिजाल, प्रहरी नायव उपरीक्षक इस्वर कार्की तथा जिल्ला शिक्षा अधिकारी गीरमान थापालाई चिट खोसेर परीक्षा टाइट गरेको भन्दै भानुभक्त उच्च मावि लहँका प्राचार्य मोहन खड्काले खगेनकोटको दल्ली स्थित आफनो घरमा वस्नै नदिएर रातको समयमा निकालिदिएका थिए। प्रमुख जिप्रल्ला अधिकारी गोविन्दप्रसाद रिजालले साँझ पख घरमा बस्न गएको बेला चिट खोसेर हाम्रा छोराछोरीको भविस्य विगार्ने त सिडिओलाइ यहा वास छैन भनेर हप्काएको बताए, उनले तिमीहरुका कारणले यहाँको परीक्षा टाइट भएको छ मेरो घरमा वस्न पाइदैन भनेपछि आफूहरु त्यहाँ नबसेर हिँडको बताए। त्यो विषयमा चैत २० गतेको समीक्षा बैठकमा छलफल गरिने उनले बताए।खड्काले घरमा बस्न नदिएपछि प्रजिअको टोली दल्लीस्थित इलाका प्रहरी कार्यालयमा गइ बसेको थियो। एक दिन अगाडि आफनै घरमा स्वागत गरेर वास वस्ने व्यवस्था गरिदिएका खड्काले परीक्षामा कडाइ गरेको भन्दै प्रमुख जिल्ला अधिकारीको टोलीलाई अपशव्द प्रयोग गरेर घरबाट निकालिदिएको जिल्ला शिक्षा अधिकारी गिरमान थापाले बताए।
शुक्रबार बिहान परीक्षा अनुगमन गरी दिउसो गाउँमा अन्य काम सकेर राति ८ बजेतिर बास बस्न भनी प्रजिअ सहितको टोली खड्काको घरमा जादा त पूरै ढोकाहरु बन्द रहेको उनले बताए।
हाम्रो टोली देखेर नजिकैको होटेलको साहुजीले खड्कालाई सिडीओ साहेबहरु आउनुभएको छ भनेर बोदलाउँदा खड्काले बाहिर आएर को सिडीओ, को डीएसपी को जिशिअ राति राति अर्काको घरमा आउने को हो तपाइँ भनेर बास बस्नै नदिएको थापाले नागरिकसँग गुनासो गरे। त्यसपछि नजिकैको होटेलमा उठीउठी भात खाएर प्रहरी चौकीमा गएर बास वस्नु पर्यो, उनले थपे।
उक्त परीक्षा केन्दमा परीक्षामा स्थानीयहरुको घुसपैठ भएर व्यापक अनियमिता भएको बताइको छ। परीक्षा सकिएपछि यस्ता अनियमिताबारे व्यापक समीक्षा हुने थापाले बताए। त्यसपछि दोषीहरुमाथि कारबाहीको प्रक्रिया अगाडि बढाइने जिशिअ थापा बताउँछन्।
