भाई छुटाउँछु भन्दा आफै प्रहरी फन्दामा

दुर्गाप्रसाद शर्मा/उज्यालो । पर्वत, असार १८ –प्रहरी हिरासतमा रहेका आफ्ना भाईलाई भनसुन गरी छुटाउन गएका पर्वत नाङ्गलीबाङ्गका एक युवा आफै जेल परेका छन् । फरार अभियुक्तको सूचीमा रहेका नाङ्गलिबाङ्ग गाबिस वडा नं ९ का राजकुमार केसी आफ्ना भाई भुवनलाई छुटाउन प्रहरी कार्यालय पुगेका बेला प्रहरीले पक्राउ गरी जेल चलान गरेको हो ।

केसीलाई नाङ्गलीबाङ्ग गाबिस, ९ कै मदन विकलाई २०६४ सालमा खुकुरी प्रहार गरी घाइते बनाएको अभियोग थियो । त्यतिबेला फरार रहेका केसी आफै प्रहरी कार्यालयमा आएका बेला पक्राउ गरी मुद्दा चलाएको प्रहरी सहायक निरीक्षक टिका पोखरेलले बताउनुभयो ।

त्यसै अभियोगको आधारमा जिल्ला प्रशासन कार्यालयले उनलाई असार १५ गते सार्वजनिक अपराध मुद्दामा १० हजार रुपैयाँ जरिवाना तोकेको थियो । प्रशासनले तोकेको जरिवाना तिर्न नसकेपछि असार १६ गते केसी जेल चलान भएका जिल्ला प्रहरी कार्यालय पर्वतले जनाएको छ ।
राजकुमार मदिरा सेवन गरी सवारी साधन तोडफोड गरेपछि पक्राउ परेका भाइलाई छुटाउन प्रहरीमा पुगेका थिए ।