दमौली । तनहुँ जिल्लाको राजनीतिक परिदृश्यमा नयाँ मोड आएको छ। स्वतन्त्र समूह जोशी ले आगामी निर्वाचनमा तनहुँ निर्वाचन क्षेत्र नम्बर १ र २ दुबैमा उम्मेदवारी दिने निर्णय गरेको छ। यो निर्णय शनिबार दमौलीमा सम्पन्न विशेष जिल्ला स्तरीय भेलामा सर्वसम्मत रूपमा अनुमोदन गरिएको हो।
भेलामा समूहका अगुवा, सदस्य, स्थानीय समाजसेवी, युवा प्रतिनिधि र क्षेत्रीय अगुवाहरूको उल्लेखनीय उपस्थिती रहेको थियो। यस अवसरमा समूहले आफ्नो लक्ष्य, प्राथमिकता र आगामी निर्वाचनको रणनीतिबारे स्पष्ट रूपमा घोषणा गरेको छ।
समूहका अगुवा दीपकराज जोशीले भने, हामी परम्परागत दलहरूको मात्र प्रत्यक्ष विरोधका लागि होइन, जनताका वास्तविक समस्या उठाउन र समाधानतर्फ अग्रसर हुन स्वतन्त्र रूपमा मैदानमा उत्रिरहेका छौँ। हाम्रो प्राथमिकता विकास, रोजगारी, शिक्षा, स्वास्थ्य र स्थानीय स्तरको समग्र सुधारमा केन्द्रित हुनेछ।
समूहले आगामी निर्वाचनको लागि विशेष रणनीति तयार पारेको छ। यसमा टोल–टोलमा पुगेर जनसंपर्क अभियान सञ्चालन गर्ने, स्थानीय समस्याहरू सुन्ने र समाधानका उपायहरू घोषणा गर्ने, साथै व्यापक समुदाय सहभागितामा आधारित घोषणापत्र तयार गर्ने योजना समावेश छ।
राजनीतिक विश्लेषकहरूको अनुसार, स्वतन्त्र समूह जोशीको उम्मेदवारीले परम्परागत दलहरूको पकड रहेको क्षेत्रमा प्रतिस्पर्धा थप तीव्र बनाउने छ। यसले मतदाताको धारणा परिवर्तन गर्ने सम्भावना बढाउने र राजनीतिक बहुलतामा योगदान पुर्याउने अपेक्षा गरिएको छ।
समूहले आफ्नो घोषणापत्रमार्फत जनमुखी एजेन्डा प्रस्तुत गर्ने योजना बनाएको छ। स्थानीय स्तरमा रोजगारी र स्वरोजगारका अवसर सृजना शिक्षा र स्वास्थ्य क्षेत्रमा पहुँच सुनिश्चित गर्नु,कृषि र स्थानीय व्यवसाय विकासको लागि व्यावहारिक योजना ल्याउनु,पारदर्शिता, जवाफदेही र सुशासनलाई प्राथमिकता दिनु जस्ता विषयहरू समावेश हुनेछन्।
यस निर्णयसँगै तनहुँमा आगामी निर्वाचन अत्यधिक प्रतिस्पर्धात्मक बन्ने देखिन्छ। स्वतन्त्र समूहको सक्रियताले मतदाताको रोजाइमा वैकल्पिक विकल्प प्रस्तुत गर्नेछ र राजनीतिक बहसलाई थप प्रभावशाली बनाउने अनुमान गरिएको छ।
