मस्कट ओमान
फागुन ७ गते ।
गत फेब्रुअरी १८ शनिवारका दिन एक जना नेपालीले आफु कार्यरत क्षेत्रमा नै आत्महत्या गरेका छन् । प्राप्त जानकारी अनुसार मस्कटको सीब भन्ने ठाउँमा आफु काम गर्ने क्षेत्रमा रहेको बाथरुमको ढोकामा झुण्डिएर आत्महत्या गरेको खुल्न आएको छ ।स्यांग्जा मालुङा २ घर हुने ३२ बर्षीय पोषनाथ बस्यालको आत्महत्याको कारण पारिवारिक हो भनी उनका भाई बिष्णु बस्यालले बताए पनि अरु थप पुष्टि भने हुन सकेको छैन । आत्महत्या गरेको स्पष्ट देखिएको कारणले मृतक बस्यालको पोष्टमार्टम गर्नु नपर्ने मस्कटका प्रहरीको भनाई रहेको जानकारीमा आएको छ ।
मस्कटको सोकत एल एल सी सीवको देवानमा कुक काम गर्ने मृतक बस्याल २००७ मा ओमान प्रवेश गरेका थिए । उनको शव नेपाल पठाउनको लागि ओमनको प्रहरीबाट थप प्रकृया पुरा गरेको कागजात साउदी स्थित नेपाली दुतावासमा पठाउने काम हुन लागेको जानकारीमा आएको छ ।
उनले कम्पनीबाट पाउनु पर्ने बाँकी बक्यौता रकम प्राप्त गरेपछि र जीवन वीमा बापतको रकम प्राप्तको लागि पनि उनी कार्यरत कम्पनीले पहल गर्न लागेको कुरा ओमानबाट सहयोगी दीपक श्रेष्ठले बताएका छन् भने ओमानको कानून अनुसार प्राकृतिक रुपको मृत्यु र आत्महत्या गरी मरेकाहरुलाई जीवन वीमा दिने नगरेको कुरा पनि श्रेष्ठले बताए । 
